⚠️小心Quishing！QR Code詐騙五年暴增14倍

近年掃QR Code成為日常生活一部分，由餐廳點餐到泊車付款，樣樣都用得上。但你又知唔知道，依家有一種新型詐騙方式，正係利用QR Code行騙？根據BBC報導，呢類「Quishing」詐騙喺過去五年間急升咗14倍，情況令人擔憂。

⚠️乜嘢係Quishing？

Quishing係由「QR Code」同「Phishing（網絡釣魚）」結合而來。騙徒會喺公共地方，例如泊車收費機、餐廳招牌，甚至包裹上面貼上偽造QR Code。一旦你掃咗呢啲假碼，就會被導向一啲詐騙網站，騙徒再用各種方法，騙你輸入銀行資料、信用卡號，甚至簽咗唔知咩自動扣數服務。

⚠️真人真事：小心一掃成千上萬走雞！

來自英國西約克郡Castleford嘅Milton Haworth先生，就因為喺政府停車場掃咗個QR Code，被誘導下載一個假App。本來以為只係收90p 確認費，點知第二日就發現戶口比人扣咗£39（約HK$380），仲冇得退款。

仲有一位女士喺Luton掃完QR Code第二日就畀人拎走£400！可怕嘅係，騙徒會將你輸入嘅資料用嚟做第二輪詐騙，例如假扮銀行或警方打畀你，令你信以為真，再損失更多。

⚠️專家：真正損失可能遠超想像

英國消費者權益組織表示，Quishing案好多時都冇報案，因為涉及金額細，一般人唔會在意。但呢啲細數，其實可能係大騙局嘅開始。詐騙集團會用呢啲資料，展開更深入、更具破壞力嘅攻擊。

⚠️如何自保？
1. 掃之前睇清楚：QR Code有冇被貼紙蓋住？有冇顏色唔一致？字體怪怪哋？
2. 唔好亂安裝App：掃完之後如果要你安裝不明App或登入銀行帳戶，千祈要小心。
3. 記住網址：官方網站通常用清晰易記嘅網址，例如政府停車場多數係“.gov.uk”結尾。
4. 用官方App或網站付款：唔肯定就自己手動去Google搜尋，不要靠QR Code跳轉。
5. 有懷疑即刻報警：小金額都唔可以掉以輕心，可能係大騙局嘅伏筆。

Source: https://www.bbc.co.uk/news/articles/cq6yznmv3gzo.amp