英國寒濕天氣點樣養生？三款超市買到的浸腳材料推薦
喺英國生活嘅朋友，相信對冬天又濕又冷嘅天氣絕對唔陌生。長期處於潮濕寒冷環境中，唔單止令手腳冰冷，仲可能令身體疲倦、抵抗力下降。其實，唔需要太複雜，每日簡單浸一浸腳，已經係一種養生又易做嘅保健方法。
中醫認為「寒從腳生」，腳底係身體嘅「第二個心臟」，有好多重要穴位。腳底有多個重要穴位，通過刺激呢啲穴位可以達到調節身體嘅作用。熱水浸腳唔止可以促進血液循環，仲可以驅寒保暖、改善睡眠、增強免疫力。對大人小朋友都好有益。常見嘅穴位包括：
• 湧泉穴💧：幫助補腎、驅寒同增強免疫力。
• 太谿穴🦶：有助溫補腎陽，令手腳變得暖和。
• 足三里穴🦵：促進胃腸健康，提升體質。
喺香港可能會用艾葉、生薑等中藥材浸腳，但英國唔容易買到艾葉，寶媽會用啲乾或新鮮香茅、薑片、玫瑰花來代替，效果一樣好，仲有天然香味，浸住腳個人都放鬆咗，天然溫和，適合一家人使用：
1. 生薑（Ginger）
生薑性溫，具有驅寒活血功效，尤其適合怕冷手腳冰冷嘅人。建議切片後煲滾10分鐘，用薑水浸腳15-20分鐘，效果最好。
2. 乾香茅（Dried Lemongrass）
英國較難買到艾葉，但香茅有類似祛濕驅寒效果，可作代替。香氣亦有助放鬆心情，用法同樣係煲水後倒入腳盆浸腳。
3. 乾玫瑰花（Dried Rose Buds）
玫瑰花可疏肝解鬱、調理氣血，對女士或情緒緊張人士特別有幫助。浸腳同時吸收香氣，有助紓壓、改善睡眠。
加碼推薦：
如果感冒、鼻塞，可加入薄荷葉一齊泡腳，有助通鼻舒緩症狀。
浸腳注意事項：
- 水溫建議保持37-40°C
- 浸腳時間15-20分鐘
- 浸完腳後務必擦乾腳部，著襪保暖更佳
⚠️以下人士浸腳要留意：
- 糖尿病患者：末梢神經較遲鈍，切忌用過熱水，易燙傷。
- 腎病患者：浸腳時間需縮短至3-5分鐘，可配合按摩。
- 孕婦或經期婦女：可用暖水浸腳舒緩不適，但避免刺激腳底穴位，唔建議加藥材或按摩。
每日10分鐘的浸腳時間，就可以簡單為自己同屋企人建立一個保暖、舒壓、抗寒的生活小習慣。即使身在英國，都可以好好照顧身體、養好元氣。
Credit: 寶媽陪月站
https://www.facebook.com/po.mastation