從Sheffield到倫敦：Hellosss 🐨親述 Ian Chan 2025 London Solo Concert💧的震撼與感動

投稿作者：Sheffield Mirror Family Hellosss Joyce   
IG @sheffieldmirrorfamily

3月12號對我同埋一班 Hellosss嚟講，絕對係一個難忘嘅日子。因為Ian終於飄洋過海嚟到英國倫敦，開展佢個人世界巡迴演唱會嘅第一站！就好似 Fan Club話咁，「相隔幾千公里，今晚終於見到你！」

當日企喺現場，我都覺得有啲唔真實。從來冇諗過，9,600公里外嘅香港舞台，可以搬到英國OVO Arena Welmeby呢個場館入面。Ian企喺舞台中央，spotlight打落去嗰一刻，我哋都知道，呢場演唱會唔單止係一場音樂表演，仲係一個只屬於Ian同Hellosss嘅音樂世界，將世界各地嘅Hellosss連繫埋一齊。

其實我係追 Mirror 之前，一直都算係佛系粉絲，鍾意聽佢哋嘅歌，但未試過為偶像做咁多事。不過，今次為咗呢場演唱會，我主動識咗一班新嘅朋友，大家一齊搭車落倫敦，一齊排隊拎應援，甚至唔介意大叫支持Ian陳卓賢，唔理周圍人嘅目光。本來係一個人去，但最後尾變咗一班人一齊去支持。最重要係，本來係收收埋埋，最後踏出Comfort Zone主動去接觸更多唔同嘅新事物，呢種感覺，真係「IAN人上身」！

當晚最震撼我嘅一刻，無過於Ian唱嘅新歌《鑿》。由香港到倫敦，佢將自己嘅熱情帶到世界舞台。聽到現場版嘅時候，我感受到佢為呢場演唱會所付出嘅努力，佢用聲音將情感傳遞，將黑暗嘅舞台變得充滿力量，令我哋感受到佢對音樂嘅熱情同執著。作為世界巡迴演唱會嘅第一站，雖然受限於場地規則，但整個舞台仍然充滿住香港演唱會嘅靈魂。無論係舞台設計、噴紙，甚至係郵差親自派送 Ian 親筆簽名相，每一個細節都睇得出Ian 嘅用心，佢希望將香港嘅演唱會原汁原味帶嚟英國。我望住周圍，見到大家舉起手燈，揮動自製嘅手幅，嗌住「Ian！Ian！Ian！」嗰一刻，大家就好似係香港一樣，全程投入Ian嘅音樂，佢帶領住我哋走過唔同嘅章節，亦感受到唔同嘅情感。

回想返今次倫敦嘅演唱會，我只想講「多謝你，Ian！無論相隔幾遠，你都係到我哋身邊。」呢場演唱會唔單止係你音樂旅程嘅一個里程碑，都係Hellosss嘅重要時刻。多謝你俾我哋呢一場不可思議嘅旅程下一次無論喺倫敦定係世界任何一個地方我哋都會繼續支持你。

LinkUHK 🚀
📌 黃頁平台： www.linkuhk.com
📌 FB Page：https://www.facebook.com/linkuhk
📌 IG：https://www.instagram.com/linkuhk/
📌 WS group: https://www.linkuhk.com/linkuhk-x-whatsapp
📌Threads : https://www.threads.net/@linkuhk